- ابو جابر الخليلي –
تاليف : توفيق فياض .
اعداد واخراج : كامل الباشا .
انتاج المسرح الوطني الفسطيني 2003
تمثيل : عماد مزعرو .
ديكور واضاءه : عماد سماره ، رمزي الشيخ قاسم .
غناء : ريم تلحمي .
تصوير فوتوغرافي : ستيف سابيلا .
تصميم اعلامي : نتاشا المعاني .
تصوير فيديو : سمارت فريم .
تسجيلات صوتيه : ستوديو اذاعة القدس – رام الله .
انتاج : المسرح الوطني الفلسطيني . 2003
تمويل : NORAD التعاون النرويجي .
********************************************************************
المكان: غرفة في بيت ايو جابر – طاولة علها جثة مكفنة ، كرسي قش خاص ، عصا خشبيه عليها جاكيت ساكو زيتي ذو ازرار نحاسية مخضرة ، قبعة زيتية كالحة ، كوفية مرقطة، مرآة معلقة على الحائط ، باب ، نافذة .
الزمان : مساء إحدى الليلات الممطرة شديدة البرق والرعد – القدس
صوت قرآن كريم صادر عن جهاز تسجيل ، اكليل من الورود كتب عليه (حرراس القدس ينعون ابو جابر الخليلي ) وضع على مدخل الغرفه بشكل بارز وملفت للنظر ، رائحة بخور تفوح داخل المكان
( بانتهاء قراءة القرآن الكريم تمر لحظات ثم نسمع صوتا يردد )
يا حواجبة يا عينيه حطوه عالمغتسل
جارت الدنيا عليه في الدنيا مالو امل
يا حواجبه يا عينيه …
( يسود الصمت خمسة ثواني ، رعد وبرق )
ابو جابر :
الله ربي والاسلام ديني ومحمد نبي والكعبة قبلتي وعشت ومت على قول لا أله الا الله .
( يقذف من داخل القبر الى ارض الغرفة ، يداه تتحركان باتجاه فمه، ابهامه الايمن يدحش نفسه في فمه ، يحاول ابعاده ، يكتشف القطن في انفه واذنيه فيزيله ويزيل رباط الرأس ، يحاول القيام ، يردد همهمات) جا جا جا ..
يقلب على بطنه، يزحف بسرعة في الغرفة ، يحاول القيام ، يقع ، يقف ، اخيرا يضحك)
*************************************************
ابو جابر :
يه يه يهنيني ، يهنيني ، يهنيني .. جا جا جا .. ( يبحث في المكان مرددا ) جا جا جا ..
( يرى الجثة ، يفاجأ بها ، ينظر نحو الجمهور ، نحو الجثة ، نحو الجمهور ، نحو الجثة ، يتحرك بصعوبة ، يقف خلف الجثة ، ينظر الهيا ، ينظر الى المرآة ، يتوجه نحو المرآه ، ينظر فيها ، ينظر الى الجثة ، الى المرآه يتحرك مبتعدا عن المرآه وقد فهم شيءا ما ، يرى الكرسي وقد غرز فيه موس كباس يحملهما ، يطرق بعصبية ، ويصرخ مناديا ! )
************************************
أبو جابر :
جابر ! الف مرة قلت ما حدا يجيب هدا الكرسي ، هدا لازم يظل محلة في فندق البترا ، غاد ، في المصرارة مفيش غير جابر الله يرضى عليه ، اكيد هوة اللي جابه ، جابر ! يا جابر ! يا ام جابر ! شو السيرة محدا رادد ، يأ ، بينها بتطق حنك مع واحدة من الجيران ، يا ترى سيرة مين جايبين اليوم ، الله يهديكي ياام جابر اكم مرة قلتلك هاي نميمة ، حرام نجيب سيرة العالم ، حرام ! ولك يا ام جابر ردي ردت المية بزورك . يأ ، وين راحوا هدول ، ام جابر ! يا ام جابر .
( يتوجه نحو الباب ، يرتد فزعا ( صوت رعد ) ، يتوجه نحو النافذة يرتد بنفس الطريقة ) يا ساتر يا رب ، يا ساتر يا رب ، دستور باسم الله الرحمن الرحيم، دستور يا اسياد دستور ! بينها عن جد الدار مسكونة . ( خائف) يا مرة ! يا حرمة ! جابر ! يا اولاد ! مش مكفيني الكوابيس اللي بتيجيني ؟ ( ينتبه لوجود الجمهور )
**************************************
اما حلمتلكو حلم ، قولوا خير اللهم اجعله خير قال انا مت وكفننوني ، وطلعتلي جنازة بتهز وبترز ، وبعدين حطوني بالقبر وراحوا ، ولاّ أنا صاحي . ولا قيتلكو حالي هون بغرفتي وقال حاطين بنص الغرفة ( ينتبه للجثة ، يتذكر ما مر به ) يأ ، شو اللي بصير معي ؟ شو القصة يا جماعة ؟ انتو مين ؟ وهدول اللي واقفينلي عالباب منظرهم بوقف شعر الرأس مين ؟ اذا كنتوا ضيوف حياكم الله واذا كنتوا.. يأ ، معقوله تكونو ملايكة ؟! لا يا عمي الملايكة منظرهم غير شكل ، كيف غير شكل يا ابو جابر أي هوه انت عمرك شفت ملايكة ولا عفاريت ؟ .. طب شو بدكو مني ؟ هاه ؟ شو بدكو ؟ بدي افهم شغله واحده، انا يا بكون عايش ، يا يكون ميت ، صح ؟ اذا عايش معناته هادا حلم وبدي اصحى منه ، واذا ميت بدي ارجع عقبري ( يضرب نفسه ليصحو ) .
هئيته فهمت ، طب رجعوني عقبري ، شو بدكو مني ؟ بدكو تعذبوني ؟ يمكن هدولاك بينفغوا ، بس انتوا ؟ ! يا اما بشر جايين تعزوا وتتشربوا فنجان القهوة وتفسخوا ، يا اما ملايكة جايين تفهموا !؟ طب اذا فهمتكوا بترجعوني .
طب والله والله والله ، وما الكو عليّ يمين ، انه اللي صار غصبن عني ، كويس ولاّ مش كويس ، مش مهم ، المهم انه غصبن عني ، بطلت قادر اتحمل ، فقعت معي .
***************************************
ليليتها ، زي كل ليله ، ام جابر نايمة في التخت ، مهي الدنيا نص ليل ، مديت منخاري من الشباك عشان افحص الطقس ، مهو أنا مئلتلكوش انه عندي انف لا يخطئ زي ابو كلبشة ، الفرق بيناتنا انه منخاره بيكتشف المجرمين ومنخاري بيكتشف حالة الطقس ، عرفت انه الليلة راح تكون برد ، لبست الساكو اللي صارله عندي من ايام الانجليز ، وحطيت البرنيطة ولفيت الحطة ، وحملت اللوكس بيد والحطه بيد :
- بدك حاجة يا ام جابر ؟
مردتش عليّ ، ضلت نايمة زي الموات وقصدت باب الكريم ( يتوجه نحو الباب ، صوت رعد ، يرتد مهدئا )
مالكو ؟ مش طالع ، بحكيلهم شو صار ، اما ورطة هاي ؟
المهم سحبت حالي من باب السباط عباب العمود ، الدنيا كانت كحل مهو مكانش في كهرباء زي هالايامات ، هادا الحكي يا جماعة كان سنة التسعة وستين ، لا ، الله لا يعينني عاالكذب يا اما آخر التمانية وستين يا إما أول التسعة وستين . ووينك يا فندق البترا - في المصرارة - بتعرفوه . حملت الكرسي ، وحطيته قدام البنك البريطاني وقعدت وباب العامود قبالي ( اغنيه لعبد الوهاب )
***********************************
بدكو الصراحة الدنيا مبتقدش صقعة كثير ، بس يا عمي طقس القدس زي اهلها معلوش رباط وبسواش الواحد ياكل لفحة هوا تجيب اجله ، هوه العمر بعزقة ؟
مسألتونيش ليش كنت اقعد غاد بنصاص الليالي ؟ كود بتفكروني صايع لا شغلة ولا عمله ، لا يا عمي ، هو انا مجنون اقعد هالقعدة زي قرد مربوط ببلاطة ؟ خصوصا في الشتا هيكد الواحد بيصير يتخيل حاله جواه الفرشة الدافية جنب مرته دفيان وبتمتع بالهبر . يعني هادا اذا بقت مرتة مربربة زي ام جابر ، ولا مستحي منكو . بس يا عمي رزق العيال ، وكل رزقة والها نطة مش هيكد .
************************************
عشر سنين ما الي غير هالشغلة ، في الزمانات بقيت شرطي ، شرطي تحارير ، شغلة خفيفة نظيفة ، وعمري ما طلبت من ربي غير الصحة والعافية ، بقيت اقول لحالي : وكلها لربك يا ابو جابر كلها كمان اكم من سنة وبتطلع عالتقاعد وبتفتحلك مخفر ، شو مغفر يا زلمة دكانة صغيرة باب السباط بتبيع فيها مصاص ، خلي الناس تمص ، وبوظة خليهم يلحسوا . هادا طبعا بعد ما تكون جوزت الولاد وخصوصا جابر ، آه جابر :
- راح اجوزه واعمله العرس اللي بالي بالك يا ام جابر ، اسمعي تألك ، انتي بتعرفي اهل الخليل اكثر مني ، انتي انولدتي وترعرعتي غاد ، مين بدك تعزمي ؟ ردي يا بنت الحلال ؟ إسمعي ، احنا مش لازم نقصر مع حدا بنعزم كل العيل الكبيرة ، دار السلايمة ، والجعبري ومزعرو والتميمي والشويكي وسند هدول عزمونا على عرس ابنهم يأ ، شو بدو يغدي كل هالعالم ؟ والله عشر باصات ما بتكفيهم . اسمعي بنعزم من كل حامولة كبارها وهمو يعزموا اللي بدهم اياه وان شاء الله بيجيبوا الكبير والصغير والمقمط بالسرير ، هدول اهلنا وعزوتنا ، ها كيف ، وخلي اهل القدس يشوفوا العراس والزفات اللي على اصولها .
( يرقص على خلفية الاغنيه )
الهيل امان الهيل أمان لا تمشي درب الحرام
الهيل امان على شعره يا شعرة ريش النعام
الهيل امان على عيونه يا عيونه عيون الغزلان
الهيل امان على خده يا خده تفاح الشام
الهيل امان على ثمه يا تمة خاتم سليمان
الهيل امان على سنة يا سنة لولو ومرجان
الهيل امان على صدره يا صدره حب الرمان
الهيل امان على ايده يا ايده سيف اليمان
الهيل امان على رجله يا رجله عمود ارخام
الهيل امان على طوله يا طوله يا غصن البان
الهيل امان على شخصه يا شخصة ضابط اركان
**************************************
مسألتونيش شو يعني شرطي تحارير ؟ تستحوش أسالوا ! .. إسألوا … شرطي التحارير هادا كان عزمنات الاردن ، كانت شغلته يبلغ الناس اوامر الحجز والحبس ، ومرات بقيت اداوم بالقشلة بتعرفوها ، يعني ادير بالي عالموقوفين آخذهم على الخلا اجلكم الله يقضوا حاجاتهم ويتوضوا وصدقوني وما الكو علي يمين اني بقيت راضي بس شو تعمل الماشطة بالوجه الشنع .
*****************************
- انت متهم انك سبيت الملك ، وحرضت المساجين على النظام ، وانك قومي عربي . هادا مش انا ، هدا الزابط زقطوا معها واحدة داشرة ودايرة من مخفر لمخفر ( يقلد مشيتها وضحكتها وغنجها ) حمدان ! مش راح اقدر اجي بكره ، معزوره ، ابعتلك اختي ؟ وانا موتي الادب والاخلاق ، خليلي ابا عن جد ودمي حامي .
فقعته شكوة جابت لي الدور ، ورموني مع المساجين في القشلة ، معلوم ما انا قومي عربي ولا شو بدك اياني اكون امريكاني ولا صهيوني ؟ بس عمري ما سبيت الملك ولا غيره وعمري ما اتدخلت في السياسة .
يخلف عليها ام جابر لولا هي وشوية اجاويد شرواكم كان نفوني عالجفر ، وما ادراكم ما الجفر ؟ سجن اللي داخله مفقود واللي طالع منه مولود .
قطعوا رزقي الله .. ولا بلاش ، ومش هيكد وبس ، حرموني من التعويضات ، مخليتش حدا من وجهاء البلد الا رحلته من انور نسيبة وجر بس عالفاضي . مضلش غير ابيع صيغة ام جابر واسافر ع عمان ، ووينك يا قصر رغدان ، اول ما يوصل الملك بسيارته برمي حالي عليه : اسمعني يا جلالة الملك ، اللي حكولك ياه عني مش مزبوط ابدا ، انا عمري ما تدخلت بالسياسة وعمري ما سبيت حدا ، بدي ارجع عشغلي وبدكو تدفعولي تعويضاتي على داير باره ، انتو جماعه حقانيه وما بترضو بالظلم ؟ اسأل عني مين ما بدك انا زلمة بخاف ربي وبعرف مصلحة الناس كويس واهم اشي عندي الاخلاق ، بعدينش هاي القدس ، بلاد مقدسه وقلة الحياة فيها ممنوعة اكثر من غيرها وبسلمه الورقة هييه عليها اكثر من عشرين بصمة وعشرين توقيع من الناس اللي بعرفوني ، لساتها معي ، تذكار ، مهو انا لا رحت ولا جيت ، مهو المتعوس متعوس ولو علقوله ميت فانوس .
***************************
وماله الحارس يخي كود مش عاجبك ، شغلة شريفة وخفيفة عصاي ، وبدله رسمية ، ولوكس وبتحمي ارزاق العالم من الحرامية والسرسرية ، واوعك تتدخل في حدا ان شا الله تشوف العالم مفحجين بنص الشارع ، اللهم اسألك نفسي ……( زامور سياره ، يقع ارضا )
اللهم اسألك نفسي ؟ مهو هدا اللي جابلنا الدور ..، ثمن سنين وبعدها العلم الاسرائيلي صار يرفرف فوق المسجد الاقصى . وولاد الميته دارو يشطحو وينطحو . ( يرقص على انغام الهورا )
**********************************
كله بيضل بالبيت ويخط خرقة بيضة فوق الباب ( يرددها عدة مرات ) فهمتو حاجة ؟ اكيد فهمتو ما انتو ملايكة والملايكة بيعرفوا لغات ، شلحت الاندروير مهو ابيض بفت وعلقته عالباب ، وست تيام والطخ يلعلع في البلد وانا جواه الدار ، مالي ومال السياسة انا لا بتحمل تعزيب ولا مقايس عن عمري .
وقال يا شارد من قضاي ما الك رب سواي ، بعدها باسبوعين الله وكيلكو صحيت عصوت خبط عالباب . ( رعد )
- اهدي يا ام جابر ! مالك بترجي زي العصفور المنتوش ريشه ؟ هدول اكيد غلطانين ، مخربشين بيني وبين واحد ثاني ، ما انتي عارفة جوزك لا بكش ولا بنش .
” وجعلنا من بين ايديهم سدا ومن خلفهم سداً فاغشيناهم فهم لا يبصرون “
مالكوا استنفرتوا ؟ مش طالع ! بحكي للجماعة شو صار عشان يفهموا ويريحوني .
استنفروا زي الجنود ، هجموا عليّ من الباب للطاقة وكلبشوني وعالقشلة ، اسبوع ولا س ولا ج .
- قومي عربي … ها ؟! انت واحد كذاب يا ابو جابر ، كذاب كبير ، شوف الملف تبعك .
- طبعا انا قومي عربي ولا شو بدي اكون ، امريكي ولا صهيوني ؟
- ماله الصهيوني يا بزونك ، مش عاجبك .
شو بزونك هاي ؟ اكيد مسبه ! بقيت بدي اقوله عيب عليك انا قد ابوك .
– مش عاجبك الصهيوني يا عرص ، مش عاجبك ، يا جوز ..
وبطلت اسمع بعدها شو قال تمنيت لو تنشق الارض وتبلعني ، وين بدي اخبي وجهي من ام جابر ، ام جابر الاصيلة بنت الاصول يقول عنها ..
( اهات )
***********************
آه بس لا اخذوا مني حق ولا باطل ، هاكيف ؟ و تميت زي ما أنا حارس في القدس بحافظ على ارزاق الناس من الحرامية واولاد الحرام ، اما ” الخربين ” اللي بيحكي عنهم الحاكم العسكري شو دخلني فيهم كل واحد ذنبه على جنبه .
- اسمع ابو جابر ، انت كان ممكن تضل في السجن عالقليلة عشر سنين بس احنا طلعناك ورجعناك على شغلك ، احنا بنعرف انك ممكن تكون مخرب خطير وممكن نرجعك عالسجن اذا ما بتثبت العكس ، انت لازم تفتح عينيك كويس وتشوف المخربين ! انت حارس ولازم تحافظ على الامن في البلد يعني اذا شفت او سمعت أي اشي انت لازم تيجي تخبرني .
قال مخربين قال ،
المزيد
